في جو يسوده المحبه والاحترام هيئة التمريض بمستشفى الأورام جامعة أسيوط يهنئون الاستاذ صبرى عزيز حكيم كبير فنى تمريض بالعيادات الخارجيه لبلوغة سن المعاش جريدة الراصد 24

بقلمي جمال القاضي

( بدون فصحى )

لما ربنا كتب علينا الصيام كان الهدف منه في النهاية هو التقوى، مش زي ماحنا فاكرين ان غرضه هو الإحساس بجوع الفقير، ولو كده كان الصيام اتفرض بس على الغني دون الفقير، الفرائض في الدين ثوابت عامة مفروضة على الجميع بدون استثناء الا في الحالات ال القرآن والسنه حددها،

نيجي للصيام، الصيام مش معناه انك تمسك عن الشهوات طول اليوم وخلاص، الصيام هو درس للمسلم على انه يتعود على النظام ويعمل كنترول لشهواته، يعمل كنترول وضبط للسانه ويمتعه من الخوض في الحديث عن الغير والكلام عن اعراض الناس وسيرتهم بالسوء، الصيام غير ان له فوايد كتير جسديه له فوايد تانيه اهم من الجسد  وهي البداية للرقي الروحي  

وال بيكون معاه صفاء ذهني والتخلص من رواسب السموم ال في الجسد من خلايا كبيرة او خلايا ميتة او مواد كان وجودها ضار للجسم ولما الجسم ومع الصيام يتخلص منها بيبدأ يسمو بذهنه وعقله في التفكير بعيدا عن شهوات الجسد

طيب انا هقولك تختبر صفاء ذهنك بصفاء الأعضاء الجسدية ازاي

بص كده مثلا لقدرتك على النظر في أول الشهر وقارنها بنهاية الشهر، اكيد لو بتقدر تميز هتلاحظ فرق كبير، هتحس ان نظرك ورؤيتك للأشياء اصبحت أوضح وكانك كنت أعمى ولسه بتشوف خلق الله لاول مره

 

كمان قارن لو انت قاعد في مكان فيه صفاء وهدوء وخضرة وبص للسماء بأول الشهر وارجع تاني بص وفي نفس المكان للسماء ولاحظ نفسك وكلامك عن قدرة الخالق في آخر الشهر، اكيد هتقول ياااه سبحان الله ال رفع السماء سبحان الله على هذه الخضرة سبحان الله على كل ماتراه عيناك من نعم وكأنك بتشوفها لأول مرة من الخضوع والخشوع ال جواك بسبب الصيام 

ترفع الانسان وابتعاده عن الشهوات مع الصيام بيعطي فرصه اكبر لشراين جسمك وال مع الصيام اتخلصت من ترسيبات كتيرة جواها من الكوليسترول ال كان متراكم في جدرانها الداخليه وكانت بتعيق تدفق الدم اصبحت بعد فتره من الصيام خاليه من الرواسب دي، وبالتالي كان معاها فرصه كبيره لتدفق الدم لجميع خلايا جسمك واعضاؤه وال  بتصفي ذهنك وتخليك تفكر كويس في الكون وخالق الكون وبالتالي تقدر تميز مين يستحق انك تعبده وبعدها تستحضر جواك  عظمة وقدرة ربنا، تستحضر جواك انك لو فكرت تعمل معصية ان ربنا مطلع وشايفك فبتبعد وترجع عن فعلها حتى لو مفيش حد معاك رغم ان مفردات فعل المعصية وادواتها  موجودة  وسهل فعلها ومن غير مايشوفك بشر ولا خايف من اي حد منهم ممكن يشوفك اصلا

الاحجام عن فعل معصية وقتها بالرغم من عدم وجود البشر هو ده الغرض من الصيام وهو ان الله  يعلمك التقوى من خلال الصيام ويعلمك  انك تخاف وتخشع لله بس  

لكن السؤال هو ايه ال اتغير عندك مع الصيام ؟

كل واحد فينا يسأل نفسه ويجاوب على نفسه وبالتالي هيعرف ان الصيام اثر فيه فعلا ولالا

هتسأل نفسك هو انا  فعلا افتكرت ذنوب كتير كنت بعملها قبل رمضان ولما افتكرتها توبت لربنا ولالا ؟ طيب لسه مصر حتى في الشهر الكريم انك تعملها ؟ لو حصل ولسه مصر على ذنوبك  يبقى كده متعلمتش حاجه من الصيام ولا له لازمه صيامك .

هتسأل نفسك هو انا صايم بالنهار بس عن الاكل والشرب والفرج وعن الحرام وخلاص وبالليل هشرب مخدرات وهنتهك الأعراض واجيب في سيرة الناس ولا الصيام خلاني امنع نفسي بصفة مستمرة عن كل ده ليل او نهار ؟ لو لسه بتعمل كل الحاجات دي بالليل يبقى كده صيامك بس كان مجرد جوع وعطش وخلاص

هتسأل نفسك وتقول هو  انا  مابيني وبين نفسي بقول امته الشهر يمر علشان انا محضر لنفسي شوية حاجات هعملها هسهر بعد الغيد عند فلانه صاحبتي او فلان صاحبي او هعمل المعصية الفلانية بس مستني الشهر يخلص بسرعه، يعني باختصار محضر لنفسك أجندة ذنوب مسبقة ولا حضرتك قلت الحمد لله خلاص كده هتوب عن كل الذنوب  ال كنت بعملها قبل رمضان وعمري ماارجع لها تاني بعد رمضان

طيب اخواتك وامك وابوك وجيرانك ال كنت دايما بتأذيهم قبل رمضان ومقاطعهم كلهم علشان ترضي زوجتك لما اصبح رمضان  عملت ايه قلت لاميصحش وحرام ال كنت بعمله ولازم اعزم اخواتي واختي ولازم احب على رأس ابويا وامي والم الكل  واعزمهم على الفطار في اي يوم بالشهر ولا لسه بتسمع كلام زوجتك لما تقولك دول بيهم وعليهم وهم ال مش بيسألوا، لو اتغيرت ووصلت رحمك ال قطعته يبقى فعلا الصيام غيرك وبقيت احسن

كل واحد فينا يراجع نفسه ويشوف حاله هو بقى ايه مع نفسه بيسمع كلامها ووسوستها للشر، ويشوف نفسه كمان وتعامله  مع غيره هو اصبح بيتعامل باسلوب احسن معاهم ولالا، يشوف نفسه مع جيرانه ال كانوا اول ماتشوفوه يجروا يقفلوا بابهم علشان خايفين منه ومن شره ولالا، كل واحد يراجع عبادته وعلاقته مع ربنا هل اصبح جواه خشوع في العبادة وخوف من ربنا ولا لسه جوانا جحود وتكبر على الناس وعلى الخالق ولالا، ساعتها هتعرف انك  استفدت ايه من درس الصيام ولالا  .